Cilj ovog dana jeste jačanje svijesti kod građana o važnosti zaštite naših ljubimaca i onih koji to još nisu, podsticaj bolje brige o psima, kao i podsjećanje koliko su oni naši najbolji prijatelji bez kojih ne bismo mogli.

Oni pomažu slijepima i slabovidima, djeci sa invaliditetom, pomažu policiji, vatrogascima i vojsci u njihovoj brizi za sigurnost svih nas. Njihova vrijednost u društvu je neizmjerna, a današnji dan služi kao podsjetnik i mogućnost da im izrazimo zahvalnost.

Oni su sa nama 15.000 ili čak prema nekim tvrdnjama 30.000 godina. Toliko dobro su se adaptirali i toliko nas vole da je na tu čistu, bezrezervnu i do smrti postojanu ljubav teško ostati imun. 

Mnogo je onih koji ne vjeruju ljudima, ali vjeruju psima.

Legendarna Merilin Monro,koju su toliko puta izdali ljudi, konstatovala je da su je "ujedali samo ljudi, nikad psi." Čovjek koji je najbolje poznavao ljudsku psihu, Sigmund Frojd tvrdio je da psi vole prijatelje i brane ih od neprijetalja, za razliku od ljudi koji nisu sposobni za čistu ljubav, jer uvijek miješaju ljubav i mržnju.

Psiholozi kažu da nema boljeg lijeka za nečije zdravlje od kućnog ljubimca. Nema boljeg psihologa od šteneta koje vam liže lice. Istraživanja su pokazala da ona djeca koja su rasla sa kućnim ljubimcem jesu mnogo društvenija, lakše se snalaze u kontaktu sa drugima i popularnija su u društvu. 

Ukoliko je dijete indiferentno, pasivno i slabo u kontaktu sa drugima, neće se osjećati usamljeno. Jer, imaće prijatelja, najvjernijeg i najodanijeg kojeg može da stekne. Psi su odličan lijek protiv usamljenost. Za samoupozdanje. Upravo zato se koriste u terapijama sa djecom, a posebno su dragocjeni za mališane do kojih je teško doprijeti, bez samopouzdanja i osjećaja da vrijede.

Od pasa možemo mnogo da naučimo. O zahvalnosti. O Požrtvovanosti. Ljubavi. Oni nas vole takve kakvi smo. I kad napravimo budale od sebe, i sami će nam se pridružiti.

Ovo je najljepši pas u Crnoj Gori 

Jedna od najpoznatijih spisateljica Agata Kristi, u Smrt na Nilu je tvrdila da od psa možemo da naučimo kako da preživimo poraz. "Oni su mudri. Otpuzaju do mirnog ćoška i ližu svoje rane, vraćaju se u svijet tek kad ponovo zacijele."

 Psi su živjeli i radili sa ljudima na mnogo načina, pa su zbog toga i zaslužili titulu „čovjekovog najboljeg prijatelja“.

Pas može da bude sve čovjeku. I obrnuto.