Kako se već pisalo, porodice su došle u sukob početkom februara nakon što je D. S. (20), mladoženja iz jedne porodice, navodno, protiv njene volje svojoj kući doveo maloljetnu sedamnaestogodišnju nevjestu, pa je došlo do žestokog obračuna sa njenim rođacima, a najnoviji masovni obračun, u kojem su osim pesnica "radile" i šipke i lopate, desio se juče u popodnevnim časovima.

Iako je maloljetna mlada vraćena još tada svom domu, zavađene porodice nijesu zakopale "ratne sjekire", jer su ostale loše uspomene i sjećanje na nemili događaj.

U srijedu su obje porodice imale svoje proslave uz konzumiranje alkohola, pa je do sukoba došlo kada su se sreli na ulici.

"Policiju je alarmirala C. S. koja je prijavila da su D. R. i S. J. tukli R. S. Policija je izašla na teren i na licu mjesta ustanovila da je došlo do sukoba S. J., D. J., D. R. i M. J. rođaka otete mlade sa jedne strane i R. S., T. S., T. S., N. S. i R. S. sa druge strane, koji su rođaci nesuđenog mladoženje. T. S. je otac mladoženje, a D. R., S. J. i D. J. su kao i on učestvovali i u prvoj tuči", kaže izvor.

Žestoka tuča u srijedu popodne, na sreću je prošla bez najtežih posljedica: M. J. je, kako se sumnja, metalnom šipkom udario po glavi N. S. dok je R. S. lopatom udarila M. J. R. S. je zadobio povrede nakon što su ga pesnicama izudarali S. J., D. J. i D. R. Njih trojica su tokom tuče ušli u automobil "golf" kojim je upravljao B. P. iz Žitkovca, a R. S. i T. S. su udarali po kolima da bi se osvetili. M. J. su članovi suparničke porodice na kraju tukli dok nije pao na zemlju, a potom ga ostavili i otišli kući...

"Svi povrijeđeni su otišli kućama. Protiv aktera tuče podnijeto je sedam prekršajnih prijava za narušavanje javnog reda i mira kao i dvije krivične prijave za nanošenje lakih tjelesnih povreda", kaže izvor.

U prvoj tuči korištena je sjekira.

Kako se pisalo, u prethodnoj masovnoj tuči u februaru teško je povrijeđen D. R. (35), brat od ujaka otete mlade, kada ga je, kako se sumnja, sjekirom u glavu udario T. S. (37), otac mladoženje, nanijevši mu prelom lobanje. Do tuče i sukoba tada je došlo  jer je D. S. (20) sin T. S. prethodno navodno oteo sedamnaestogodišnju djevojku koju je želio da oženi, koju je protiv njene volje doveo svojoj kući. Njegov čin je razljutio njene rođake - D. R. (35), I. J. (22), D. J. (23) i S. J. koji su krenuli da otetu djevojku, koja još nije ni punoljetna, vrate kući.

D. R. je ponio sjekiru kojom je krenuo na T. S., oca D. S., čim su došli u njihovu kuću. Ali, T. mu je oteo iz ruku i njome je, kako se sumnja, udario po glavi nanijevši mu teške povrede. Tada je počeo obračun članova zavađenih porodica uz upotrebu flaša i kamenica.

Izvor: Srbija danas