Plavi kit je gotovo izumrla vrsta. Imao je godinu dana i bio je dugačak 10 metara.

Leš životinje otkriven je u nedjelju na plaži u gradu Kamakura koji se nalazi na oko 70 kilometara južno od Tokija. 

Plavi kit je najveća životinja na svijetu, može da poraste i do 30 metara, kao i da teži oko 170 tona. 

Uzrok smrti pronađenog plavog kita nije poznat, prenosi BBC. 

Njegove ostatke će sada proučavati stručnjaci, zbog čega su na Kamakura plaži podignuti šatori. 

Riječ je o mužjaku dugačkom 10 metara koji je rođen ove godine, kaže za japanske medije stručnjak iz Nacionalnog muzeja nauke i prirode. 

Zbog dugogodišnjeg komercijalnog lova plavi kitovi su danas gotovo izumrla vrsta. 

Svjetski fond za prirodu kaže da je zbog klimatskih promjena i udara brodova plavi kit i dalje ugrožena vrsta. 

Tokom ljetnjih mjeseci ove sisare je uglavnom moguće vidjeti blizu Antarktika. 

Japan i dalje ima flotu za lov na kitove, ali insistiraju na tome da je njihov lov samo u naučne svrhe. 

Japanski lovci su u maju uhvatili i ubili 122 ženke minka kitova koje su nosile mladunce. Kako navode, to je bio dio terenskog istraživanja.