– To je globalno otopljavanje, nije čudo što ima kupača – kaže za Radio Jadran  morski vuk, Rambo Amadeus.

Najupornija i najodvažnija Novljanka, Vera, kupa se na Bokinoj plaži, “Bijela vila”. Često joj se pridruži i Jasna, kao i još nekoliko vremešnijih, ali i mlađi Novljanin Čedo.

Vera ima 65 godina i s ponosom ih nosi. Ima preplanuo ten, osjeća se dobro, zdravo i kaže da dolazi svaki dan.

More je samo 18 stepeni, jer tu je u blizini i jedan izvor. Sunča se kratko, prošeta, pa uđe u vodu, i tako bar 5-6 puta dok ne ode s plaže.

Sve dok bura dobro ne rashladi more, eto, Vere na “Bijeloj vili”.  Lani je sezonu sa prijateljicom Jasnom završila u decembru. Ove godine, ko zna, jer, sinoptičari najavljuju popodne i večeras jak sjeveroistični vjetar, odnosno buru. Rashladiće more i kopno.

Foto: Radio Jadran

Inače, kupača ima i na drugim plažama ovih dana, čak i dvoje mališana  sa nepunih 10 godina kupali su se na kupalištu Rafaelo. Uživali  su u moru, kao da je najtoplije:

– Nije hladna voda, mi smo sa sjevera – kroz smijeh su kazali za Radio Jadran dok su plivali i praćakali se.