Lider Socijalističke narodne partije (SNP) i ministar poljoprivrede, šumarstva i vodoprivrede Vladimir Joković kazao je da će poslanici njegove stranke glasati za smjenu ministra pravde Andreja Milovića.

- Mi ćemo poštovati koalicioni dogovor, a to je da će SNP podržati ono što PES odluči. Nije naš stav odnos prema gospodinu Miloviću, ili što je uradio dobro ili loše - to je odluka premijera koji je kapiten 44. Vlade i, naravno, ta odluka kad dođe u parlament, siguran sam da će je SNP - naglasio je Joković za TV Nova.

On je uvjeren da će Milović biti smijenjen.

- Mi bi pokazali nepoštovanje prema premijeru i partiji koja je dobila mjesto ministra pravde, a to je najveći konstituent izvršne vlasti - naglasio je Joković.

Demokrate, bivši Demokratski front i GP URA nijesu se oglašavali povodom ove teme, a iz Bošnjačke stranke su za TV Nova rekli da će se izjasniti kada ta tačka bude na dnevnom redu parlamenta.

Demokratska partija socijalista i Socijaldemokrate (SD) odluku će donijeti nakon stranačkih organa, ili rasprave na plenumu, a saglasni su da je cijela Vlada za ostavku jer je neozbiljna.

Poslanik DPS-a Nikola Janović kazao je za Nova TV je rekao da bi jedino logično rješenje bilo razrješenje cijele Vlade.

- Najpoštenije i najodgovornije bi bilo da svi daju ostavke, a zajedno sa tim i raspuštanje parlamenta koji je vladajuća većina napravila kao uslužni servis Vladi - ocijenio je Janović.

Sličnog mišljenja su i u SD-u.

- Ova inicijativa i kompletna situacija govore koliko je Vlada Milojka Spajića nestabilna i najčistije rješenje bi bilo da idemo na vanredne parlamentarne izbore. Ali to nikome iz parlamentarne većine ne ide u prilog. Najbolje o tome govore rezultati lokalnih izbora u Budvi i Andrijevici - poručio je poslanik SD-a Nikola Zirojević.

Na pitanje da li Milović može "preživjeti" glasanje u parlamentu, u DPS-u i SD-u su saglasni da ih više ništa ne može iznenaditi kada je riječ o Vladi Milojka Spajića.

Janović je rekao da Vlada nastavlja neozbiljno djelovanje, te da niko trenutno ne može odgovoriti hoće li Milović biti smijenjen u Skupštini.

Zirojević je poručio da SD neće biti sredstvo za obračun Spajića, kao ni drugima unutar parlamentarne većine.

- Ne bi me iznenadilo da se nešto desi i da Milović ostane na poziciji mkinistra pravde, s tim što bi u tom slučaju bila poslata poruka da predsjednik Vlade nema većinu u parlamentu - naglasio je Zirojević.