Stranka je na evropskim izborima u maju osvojila 5,9 odsto glasova, ali nije uspjela da dobije zastupnika u Evropskom parlamentu, dok je na julskim prijevremenim parlamentarnim izborima s istim postotkom glasova dobila dvije zastupnice i dva zastupnika, što je bilo prilično iznenađenje.

Tokom jučerašnje rasprave o imenovanju nove vlade premijera Mire Cerara, predstavnici Udružene ljevice u parlamentu su univerzitetskog profesora prava nazivali "kolegom", dok su se međusobno oslovljavali "drug" i "drugarica" ili "gospođa drugarica" i "gospodin drug".

Obnovi komunističke ikonografije i izraza, prenosi Hina, najoštrije se protivi najjača opoziciona Slovenačka demokratska stranka koja bivšoj premijerki Alenki Bratušek zamjera da je stvorila društvenu atmosferu za takve pojave.

Janšina stranka je obavijestila predsjednika nove Evropske komisije Žan-Klod Junkera da se Bratušek fotografisala s crvenim zvijezdama petokrakama, simbolom jugoslavenskog komunizma i da je jednom prigodom pjevala pjesmu "Bandiera rosa" što je, prema ocjeni konzervativnih stranaka, diskvalifikuje za visoki položaj u Komisiji.

Slovenački parlament potvrdio je sinoć na vanrednom zasijedanju novu koalicionu vladu premijera Cerara, čija je stranka pobijedila na julskim izborima i nakon toga ušla u koaliciju sa Demokratskom strankom penzionera i Socijalnim demokratima.

Za 16-članu vladu, sastavljenu od tri stranke lijevog centra, glasalo je 54, dok je protiv bilo 25 poslanika slovenačkog parlamenta koji broji 90 članova.

Izbori su raspisani nakon što je Bratušek u maju podnijela ostavku, pošto nije ponovo izabrana za lidera Pozitivne Slovenije.

Cerarova vlada je obećala restriktivnu fiskalnu politiku, uključujući smanjeno trošenje i bolje prikupljanje poreza, a Cerar je poručio: "Ako ne djelujemo odlučno, sadašnje troškove za plate i penzije plaćaće naša djeca".